<童工香港遊>
香港神獸系列

大家可能唔知道,其實有唔少神獸一直潛伏喺我地身邊,默默咁守護我地。

於是,童工決定要親身拜會呢啲神獸,表揚佢地嘅貢獻: 


神獸指數:8

中葵涌公園中間放左一尊牛雕塑,原來呢一帶以前係個牛場,後來牛場關閉變成公園,放返隻牛做紀念,不過連唔少街坊都唔知有呢隻神獸喺度。牛耳曾經受破壞「斷了」,之後才駁回來,大家記住錫住佢呀!

位置:中葵涌公園


青蛇

神獸指數:6

屯門公園經常因為錯嘅原因成為新聞亮點,但其實喺「歌舞昇平」嘅區域之外,內裡有一個爬蟲館,小朋友可以近距離見到蛇、龜、蜥蜴等各種爬蟲類動物,外面就有呢條蛇,有啲凶狠。

位置:屯門公園


神獸指數:7

這一隻鵝曾被譽為香港十大地標之首,深井出名燒鵝,就整一隻鵝做地標,居然咁都得!聽起來好俗,但這樣反而引起童工老竇興趣,專誠嚟深井與神鵝嚟一張合照。最利害是神鵝下面的彩蛋,又是原來咁都得!

位置:深井迴旋處


金龍

神獸指數:5

銅鑼灣有條金龍,正名叫「蟠龍匯瑞」,但係條龍有啲離地,因為雕塑上面貼左價值廿多萬元金箔,為左驚人刮走,就喺下面起了一個座。另外因為安全島空間有限,龍就捲成蛇餅,少咗威勢,直接令神獸指數大打折扣。

位置:銅鑼灣


跑馬地 翠河

神獸指數:9

去得搵金龍,就梗係要搵埋神馬。附近嘅馬場其實有一個香港賽馬博物館,裏面有一代馬王「翠河」嘅標本。翠河當年喺綠茵場上所向披靡,老竇嗰代人都實(剩係)講得出呢隻馬名。喺博物館仲可以望到出邊嘅跑道。

位置:香港賽馬博物館


石獅子

神獸指數:8

喺銀行前面放一對獅子作為守護獸,其實十分普遍,但係喺中環嘅中國銀行就有啲特別,因為仔細留意,除左正門嗰一對,喺大廈側邊其實仲有一對設計風格完全唔同嘅石獅子!話說當時中銀搵左意大利設計師設計,用簡單線條設計獅子配合大廈的外觀。但係咁樣獅子喺外觀上就分唔到雌雄,後來據聞因為風水考慮,都係將前門嗰對轉返比較傳統嘅一公一母獅子像,喺側門就放返原本嘅設計。

位置:中環中銀大廈


麥兜

神獸指數:10

要數「終極神獸」,當然要去尖沙咀星光大道搵「神豬」!呢隻麥兜全新閃令令,人見人愛,全部都伸手去摸。星光大道以往明星嘅手印都搬咗上去欄杆,舊年重開時仲特別幫麥兜整咗手印!

位置:尖沙咀星光大道


大家若果仲搵到邊隻神獸,可以話俾童工知!

Leave a Reply

Your email address will not be published. Required fields are marked *